Norske kveners forbund – Ruijan kvääniliitto aikkoo tukkeet nuorisobedriftiä, Terä UB:ta, 3000 (kolmela-tuhanela) kruunula ette se saattaa aloittaat toimintansa. Tuki annethaan koska bedriftin moolina oon vahvistaat ja tukkeet kväänin kulttuuria. Terä UB alkkaa valmistaat puukkoi jonka tupiissa oon symbooleita ja sannoi kväänin kulttuurista ja kielestä.
Viiden koululaisen oma bedrifti
Terä UB oon nuorisobedrfiti jonka oon perustanu viisi tytärtä jokka studeerathaan Pohjois-Tromsan jatkokoulussa (Nord-Troms videregåendeskole). Tyvärten idea kväänipuukosta voitti ensimäisen sijan Gründeridol:ssa (Pohjois-Troms) ja nyt het aijothaan aloittaat produktiitten valmistuksen. Tyttäret muistelthiin Ruijan Kaijule ennen joulua ette het toivothaan ette heidän produkti sattais auttaat kväänin kulttuuria ja tekis sen enämen näkkyyväksi. Sie saatat lukkeet koko Ruijan Kaijun artikkelin täältä.
Bedrifti työtelee nyt puukon ja tupin prototyypin kans jonka pitäis olla valmis januarikuussa.
Oma nettisaitti ja Facebook-sivu
Ko prototyypi oon valmis ja produktien valmistus alkkaa, sie saatat ostaat oman puukon bedriftin nettisaitilta. Se oon kans sovittu ette jokku putikit Raisissa saatethaan myydä puukkoa. Nyt bedriftilä oon jo oma Facebook-sivu jonka sie löydät täältä: Terä UB.
